රටේ අනාගත වත්කම දරු පරපුර බව ජනාධිපති ගෝඨාභය රාජපක්ෂ මහතා පවසයි.
ලෝක ළමා දිනය වෙනුවෙන් නිවේදනයක් නිකුත් කරමින් ජනාධිපතිවරයා අවධාරණය කරන්නේ දරුවන් දැනුමෙන් පෝෂණය කොට කුසලතා වර්ධනය සඳහා අවස්ථාව සලසා දීම සමස්ත සමාජයේම වගකීමක් බවයි.
”අපේ රට – අපේ දෑතින්”යන්න තේමා කරගනිමින් පැවැත්වෙන මෙවර ලෝක ළමා දිනය වෙනුවෙන් ජනාධිපතිතුමා නිකුත් කල සම්පූර්ණ නිවේදනය පහතින් දැක්වෙයි.
” රටේ අනාගත වත්කම අපේ දරු පරපුරයි. ඔවුන් දැනුමෙන් පෝෂණය කොට කුසලතා වර්ධනය සඳහා අවස්ථාව සලසා දීම සමස්ත සමාජයේම වගකීම වන්නේය. දරුවන්ගේ කායික මානසික පෝෂණය මෙන්ම යහපැවැත්ම තහවුරු කිරීම ප්‍රමුඛ කාලීන අවශ්‍යතාවකි.
රටක් ජාතික හෝ ජාත්‍යන්තර සංවර්ධන නිර්නායක කොපමණ දුරට ළඟා කර ගත්ත ද සමාජය මානව දායව බඳු යහ ගුණ පිරි මනුෂ්‍යයන්ගෙන් තොර නම් එය පතිරූප දේශයකැයි මම විශ්වාස නොකරමි. එවන් රටක් ගොඩනැගීමට අපි සියලු දෙනා ගුණ නැණ මෙන්ම ශිල්පීය වශයෙන් ද භාෂාමය ඥානයෙන් ද දරු පරපුර සන්නද්ධ කළ යුතුය.
භෞතික සහ මානසික ද්‍රරිද්‍රතාව දුරු කළ පුරවැසියන් වාසය කරන රටක් ගොඩනැගීම මගේ ඒකායන අපේක්ෂාවයි. එබඳු රටක දරුවන් සතුටින්, සැනසීමෙන්, සුවයෙන් වාසය කරනු නියතය. ඒ නියතය අත්දකින අත්විඳින පරපුරක් ගොඩනැගීමට ඔබේ දරුවාගේ ළමා කාලය ඔබ කල්පනාකාරීව මෙහෙයවනු ඇතැයි මම සිතමි. මෙවර ලෝක ළමා දින තේමාව වන ”අපේ රට – අපේ දෑතින්” යන්න යථාර්ථයක් කර ගත හැක්කේ එවිටය.
ගෝඨාභය රාජපක්ෂ
2020 සැප්තැම්බර් මස 30 වන දින.”
